இ-பதிவு முறை அமலுக்கு வந்தது நாமக்கல் மாவட்ட எல்லையில் போலீசார் தீவிர வாகன சோதனை

இ-பதிவு முறை அமலுக்கு வந்ததைத்தொடர்ந்து நாமக்கல் மாவட்ட எல்லையில் போலீசார் தீவிர கண்காணிப்பு பணியில் ஈடுபட்டனர்.

தமிழகத்தில் கொரோனாவின் 2-வது அலை வேகமாக பரவி வருகிறது.

 இதனை கட்டுப்படுத்த கடந்த 10-ந் தேதி முதல் வருகிற 24-ந் தேதி வரை மாநில அரசு முழு ஊரடங்கை அமல்படுத்தி உள்ளது. மேலும், ஞாயிற்றுக்கிழமைகளில் தளர்வில்லா ஊரடங்கை கடைபிடிக்கவும் உத்தரவிட்டுள்ளது.

 இதனிடையே வாகன போக்குவரத்தை கட்டுப்படுத்தும் விதமாக, வெளி மாவட்டங்களுக்கு செல்லவும், மாவட்டத்திற்குள்ளும் பயணிக்க இ-பதிவு முறையை அரசு கட்டாயமாக்கி உள்ளது.

இதன்படி திருமணம், நெருங்கிய உறவினர் இறப்பு, மருத்துவ தேவைகள், முதியார் சேவை உள்ளிட்ட அத்தியாவசிய காரணங்களுக்கு செல்வதற்கு மட்டுமே மாவட்டம் உள்ளேயும், வெளியேயும் செல்லலாம் எனவும், இதற்கு இ-பதிவு கட்டாயம் எனவும் அரசு அறிவித்தது. இந்த உத்தரவு நேற்று காலை 6 மணிக்கு நடைமுறைக்கு வந்தது.

இதையொட்டி நாமக்கல் மாவட்ட எல்லையான பரமத்திவேலூர் காவிரி இரட்டை பாலம், பள்ளிபாளையம் காவிரி பாலம் உள்பட மாவட்டத்தின் அனைத்து எல்லை பகுதிகள் மற்றும் முக்கிய பகுதிகளில் நேற்று போலீசார் தீவிர கண்காணிப்பில் ஈடுபட்டனர். அப்போது அவர்கள் இ-பதிவு செய்யாமல் வந்த வாகனங்களை நிறுத்தி, திருப்பி அனுப்பினர்.

பரமத்திவேலூர் இரட்டை காவிரி மேம்பாலத்தில் கரூர்-சேலம் தேசிய நெடுஞ்சாலையில் துணை போலீஸ் சூப்பிரண்டு ராஜாரணவீரன் தலைமையில் போலீசார் வாகன சோதனையில் ஈடுபட்டனர். அந்த வழியாக மோட்டார் சைக்கிள், கார் உள்ளிட்ட வாகனங்களில் வந்தவர்கள், இ-பதிவு செய்துள்ளனரா என ஆய்வு செய்தனர். அப்போது காய்கறி, மளிகை, மருந்து உள்ளிட்ட அத்தியாவசிய தேவைகளுக்கான வாகனங்கள், அவசர தேவைக்காக இ-பதிவு செய்த வாகனங்கள் தவிர மற்ற வாகனங்களை போலீசார் திருப்பி அனுப்பினர்.

நாமக்கல்-ஈரோடு மாவட்ட எல்லையான பள்ளிபாளையம் காவிரி பாலத்தில் போலீசார் தடுப்புகள் அமைத்து தீவிர கண்காணிப்பு பணியில் ஈடுபட்டனர். பள்ளிபாளையம் போலீஸ் இன்ஸ்பெக்டர் சாந்தமூர்த்தி தலைமையில் போலீசார் வாகன சோதனை நடத்தி, தேவையின்றி வந்தவர்களை திருப்பி அனுப்பினர். 

இதேபோல் வாகன ஓட்டிகள் இ-பதிவு செய்துள்ளார்களா

என ஆய்வு செய்து, என்ன காரணங்களுக்காக செல்கிறார்கள் என்பதையும் விசாரித்தனர். மேலும், பள்ளிபாளையம் பழைய காவிரி பாலத்தை மூடி சீல் வைத்தனர். சோதனையின் போது இ-பதிவு இல்லாமல் ஈரோடு, கோவை உள்ளிட்ட பல்வேறு மாவட்டங்களில் இருந்து பள்ளிபாளையத்திற்கு வந்தவர்களை போலீசார் எச்சரித்து அனுப்பினர்.